തിരൂര്‍: കുറുക്കന്‍ ഒരു പ്രദേശത്തെ ജനങ്ങളെ മുഴുവന്‍ ഒരു മണിക്കൂറോളം വിറപ്പിച്ചു. കടിയേറ്റ് മൂന്നുപേര്‍ക്ക് ഗുരുതര പരിക്കേറ്റു. വെള്ളിയാഴ്ച വൈകീട്ട് നാലരയോടെ തിരൂര്‍ നഗരസഭയിലെ തെക്കനന്നാരയിലാണ് സംഭവം. കുറുക്കനെ ഒടുവില്‍ നാട്ടുകാര്‍ തല്ലിക്കൊന്നു.കുറുക്കന്റെ കടിയേറ്റ അന്നാരയിലെ കാലടിപ്പറമ്പില്‍ സൈനബ (55), മകന്‍ സിദ്ദാര്‍ (34), വെളുത്തേടത്ത് പറമ്പില്‍ ശ്യാംകുമാര്‍ (32) എന്നിവരെ ഗുരുതരമായ പരിക്കുകളോടെ കോഴിക്കോട് മെഡിക്കല്‍ കോളേജ് ആസ്പത്രിയില്‍ പ്രവേശിപ്പിച്ചു.
കുറുക്കന്‍ ഈ പ്രദേശത്ത് നായകളെ കടിച്ചതായി നാട്ടുകാര്‍ പറഞ്ഞു. വാര്‍ഡ് കൗണ്‍സിലര്‍ പി.കെ.കെ. തങ്ങള്‍ സ്ഥലത്തെത്തി കുറുക്കനെ കുഴിച്ചിടാനുള്ള നടപടിയെടുത്തു.